Macaafni Qulqulluun Raawwatee “Sagalee Waaqayyoo” ti

 

                 Macaafni Qulqulluun Raawwatee “Sagalee Waaqayyoo” ti

Macaafni Qulqulluun sagalee Waaqayyoo ta’uu isaa ragaawwan gargaaran gosa lamatu jiru.

1. Ragaa Keessaa (Internal Evidence)

2. Ragaa Alaa (External Evidence)

1. Ragaa Keessaa (Internal Evidence): Kana yommuu jennu haalotni Macaafa

Qulqulluu ofiidhuma isaa keessatti ilaalamanii fi dhuga-bahumsa Macaafichi ofii isaa kennu

jechuu dha.

A. Macaafni Qulqulluun mataan isaa sagalee Waaqayyoo ta’uu isaa barreeffamootni

dhibba baay’eetti kan lakkaa’aman ni mirkaneessu.

Fakkeenyaaf: Uma 1 fi 2 “Waaqayyos … jedhe”

Kes 6:6 – 9 “Ani har’a kanan si abboomu/ajaju sagalee kana”

Iya 1: 8“Macaafa seeraa kana … jedhee ani si in abboomneeree?”

Macaafa Qulqulluu keessatti sagaleewwan“Waaqayyos jedhe, Waaqayyoo akkas jedha” jedhan

si’a baay’ee baay’ee irra deddeebi’amee barreeffameera. Kanas kan dubbate sagaleen

kallattiidhaan afaan ofii isaa keessaa ba’uu isaa agarsiisa. Caqasawwan kanneen biroos Macaafni

Qulqulluun sagalee Waaqayyummaa isaa ni mirkaneessu (2Sam 22: 31, Far 1: 2, 12: 6, Fak 30: 5

– 6, Isa 55:10, Er 15:16, Dan 10:21, Lak 22:38, Kes 18:18 – 20, Er 1:9, 23:16 – 22, His 2:7).

B. Gooftaa Yesuus Macaafota Kakuu Moofaa keessaa caqasuudhaan sagalee Waaqummaa

isaa mirkaneesseera.

Seenaawwan Kakuu Moofaa keessatti barreeffaman, hojii ajaa’ibsiisaawwan /dinqiiwwan/

caqasuudhaan dhugummaa isaanii mirkaneesseera.

Fakkeenyaaf:

Seenaan uumamaa Seera Uumamaa keessatti barreeffamuu isaa (Mat 19:4)

Dhugummaa seenaa Addaamii fi Hewwaan (Mat 19: 4 - 6)

Waa’ee Abeel (Mat 23:35)

Waa’ee Seexanaa (Luq 11:18, His 28:11 - 19)

Waa’ee Nohi (Mat 24:37 - 38)

Waa’ee Yoonaas (Mat 12:39)

Waa’ee haadha manaa Loox (Luq 17: 32) fi kkf

Yesuus Macaafota Kakuu Moofaa caqasuu fi isa irrattis dhugummaa caqasawwan raawwataman

sagalee raajiidhaan mirkaneessuu isaatiin sagalee Waaqummaa Macaafotichaa irra caalaatti

agarsiiseera.

C. Sagaleen Waaqayyoo qajeelaa /sirrii/ ta’e karaa barreessisoota raajotaa dabarfameera

Waaqayyo irra deddeebi’uudhaan afaan raajotaa keessaan darbuudhaan dubbateera. Akkasumas

warri inni gaggeesse sagalee isaa irraa otoo hin hir’isiin ykn itti hin dabaliin barreessaniiru.

Fakkeenyaaf: 1Mot 14:18, 16:12, 34, 2Mot 9:36, 14:25, Er 37:2, Zak 7:7, 12

Sababii kanaaf jecha raajotaa kan hin kabajne sagalee isaa akka hin kabajnetti barreeffameera.

Kes 18:19, 1Sam 10:8, 13:13 – 14, 15:3, 19, 23, 1Mot 20: 35 – 36 fi kkf 1Qor 11:23, 14:37, 7:12

(Phaawuloos sagalee isaa sagalee Gooftaa irraa adda baasee kaa’eera)

Kana irratti dabalataanis, Macaafni Qulqulluun namootni ofii isaanii namootaaf kan barreessan

otoo hin ta’iin namoota Hafuurri Waaqayyoo isaan gaggeesseen kan barreeffaman akka ta’e in

dubbata (2Phex 1:20, 21).

Kana waan ta’eef dhugaa Macaafa Qulqulluu irratti Hafuurri Waaqayyoo boqochuu fi sagalee

Waaqayyoo ta’uus mirkaneessuu danda’eera.

2. Ragaa Alaa (External Evidence): Macaafni Qulqulluu sagalee Waaqayyoo ta’uun isaa ofii

isaa qofa kan mirkaneessu otoo hin ta’iin, ragaawwan baay’ee warra shakkitoota iyyuu

amansiisuu danda’uun kan guutame dha.

A. Walitti fufinsaa fi soroorummaa Macaafa Qulqulluu: Macaafni Qulqulluun barreeffamee

xumuramuuf yeroo inni fudhate gara waggoota 1600tti kan dhiyaatu dha. Egaa barreessaa seera

uumamaa fi mul’ata Yohaannis gidduu fageenya waggaa hamma kanaatu (waggaa 1600) jira.

Akkasumas namootni Waaqayyo sagalee isaa barreessisuuf itti fayyadame garaagarummaa

beekumsaa, akkaataa jireenyaa, hojii fi kkf kan qaban yommuu ta’u, erga akkas ta’ee namootni

baroota garaa garaa keessa turan kan wal hin beekne akkamitti Macaafota walitti fufinsaa fi

soroorummaa /jal’ina kan hin qabne/ qabu barreessuu danda’anii? Kana namni kamiyyuu falmuu

kan hin dandeenyee fi kan inni barreeffames gaggeessaa Hafuura tokko qofaan ta’uu isaa dhugaa

mirkaneesse dha.

B. Gad fageenyummaa Mul’ata Macaafa Qulqulluu: Hamma Macaafa Qulqulluu dhugaan

kan guutee fi baay’ee gad fageenya kan qabuun kan nutti agarsiisuu danda’u addunyaa kana irra

macaafni biraa hin jiru. Barreessitootni waa’ee argamsoota ammayyaa beekumsa tokko illee otoo

hin qabaatiin wantoota barreessan,har’a qorannaa saayinsaawaatiin hafteewwan ykn hambaawwan lafa keessaa qotamanii bahan caalaatti mirkaneessuu danda’eera. Hojiiwwan

karooraa fi kaayyoo baay’ee guddaa mul’isuutiin akkasumas, sagaleen raajii isaa yommuu

raawwataman ilaaluudhaan sagalummaa Waaqayyootiin salphaatti mirkaneessuun in danda’ama.

Geengummaa dachee, qabiyyee roobaa, bishaanirra bololi’uu dachee, urjii hamaaketaa (Polar

bear), duraa duuba uumamaa, dacheen boca dhabeettii akka turte, bishaaniin kan haguugamte

akka turte, biqiltootni lubbu-qabayyii jalqaba lafa kanarraa (The beginning of life on earth) ta’uu

isaanii ogummaawwan uumamaa kanneen biroo fi kkf jalqabuma bara durii kan barreeffaman

yommuu ta’u har’a addunyaa saayinsiidhaan akka argamsa haaraa argamee hin beekneetti

mirkanaa’eera.

C. Guddummaa Amala Macaafa Qulqulluu: Sagalee barreeffame isa ta’e Macaafa Qulqulluu

fi sagalee foon jiraataa ta’e Yesuus Kiristoos bifa wal fakkaataadhaan aangoon isaanii

mul’ateera. Kana jechuunis, sagaleen foon ta’ee barreeffamaan taa’e, sagalee Waaqaa akka ta’ee

fi dhimma Hafuuraa hunda irratti aangoo murteessuu akkasumas eenyuyyuu mormuu kan hin

dandeenye ol aantummaan akka jiru beeksiseera.

D. Aangoo Macaafa Qulqulluu Isa hin Loogne: Macaafni Qulqulluun ilma namaa kam irratti

iyyuu aangoodhaan dubbata. Cubbamaa ta’uu fi dadhabbummaa nama hundaa saaxila baaseera.

Qalama/kobbee/ namaatiin yoo barreeffames namaa gara namaatti otoo hin ta’iin, sagalee aangoo

Waaqayyo irraa gara namaatti kan ta’e dabarsa. Mootota, hiyyeessota, dureeyyota, ergamoota,

uumama addaa irratti aangoo sagalee murtii dabarsuu qaba.

E. Guddummaa Barsiisa Macaafa Qulqulluu: Macaafni Qulqulluun icciitii beekumsa dhala

namaa olii fi adda ta’e in mul’isa. Dhimma kam irratti ibsa beekumsaa inni kennu baay’ee

baay’ee guutuu fi sirrii yommuu ta’u, beekumsa yeroon isa hin jijjiirre, teekinooloojiin kan isa

hin hambifne in mul’isa. Kana irraa kan ka’e, Macaafa durii durii ykn Macaafa ammayyaa dha

jechuudhaaf waan rakkisuuf “Sagalee bara baraa /ዘላለማዊ ቃል/” jedhamuu danda’eera.

F. Qabiyyee Sirna Barreeffama Isaa: Gama kanaan yommuu ilaalamu dhugumatti dandeettii

naamootaatiin kan hin barreeffamne ta’uu isaa ariitiidhaan beekuun in danda’ama. Qabiyyeen

keessa isaatti argamu sirna barreeffaa jiran hunda kan dhuunfate dha. Gabaasota seenaa, raajota,

weedduuwwan, tiyaatiroota, kan waraanaa, seenaawwan jaalalaa kan qabate dha. Kunis namoota

sadarkaa beekumsaa kam irra jiran booji’uuf humna akka qabaatu isa taasiseera.

G. Humna Jijjiiruu fi Baay’inaan Maxxanfamuu Macaafa Qulqulluu: Addunyaa keenya

kana irratti hamma Macaafa Qulqulluu saba garaa garaaf afoonota garaa garaatti macaafni hiikame hin jiru. Gama baay’ina maxxansaatiinis matumaa Macaafa Qulqulluu wajjin kan wal

dorgomu hin argamu. Dabalataanis, ergaawwanii fi beekumsa Macaafa Qulqulluu keessa jiraniin

namootni jijjiirama jireenyaa fi kaayyoo sirrii ta’e fiduu isaaniitiin Macaafni Qulqulluu sagalee

Waaqayyoo ta’uu isaaf ragaa dha. Sagalicha irraa kan ka’es, seenaan namoota kuma baay’ee fi

biyyootaa jijjiirameera. Dandeettiin nama qulleessuu, haaressuu, jijjiiruu isaa shakkii tokko

malee sagalee Waaqayyoo ta’uu isaaf ragaa dha.

       3. 2. Macaafni Qulqulluun Dhugumatti “Hafuura Waaqayyoo” ti.

Macaafni Qulqulluu Hafuura Waaqayyooti yommuu jennu, namoota Waaqayyo barreessisuuf itti

fayyadame gaggeessaa guutuu /dhugaa/ ta’een akka barreessaniif taasisuu isaa agarsiisuudhaafi

dha. Hafuura Waaqayyoo (inspiration) jechi jedhu afaan Giriikiitiin “Theopneustos” jedhamee

isa barreeffame yommuu ta’u, hiikkaan isaas “Waaqayyo hafuura baafate, hargane” akka

jechuu ti, kutaa Macaafa Qulqulluu kun keessatti barreeffame hiika garaa garaatiin kaa’ameera

(2Xim 3:16).

“Macaafa Hafuura Waaqayyoo of keessaa qabu…” (Hiikkaa 1954)

“Macaafni Qulqulluu hundi gaggeessaa Hafuura Waaqayyootiin kan barreeffame dha” (Hiikkaa

1980)

“Macaafotni Qulqulluu hundi Hafuura Waaqayyoo kan of keessaa qabani dha” (Hiikka waalta’aa

haaraa /አ.መ.ት/)

“All scripture is given by inspiration of God” (KJV)

“Every part of scripture is God - breathed” (The Message)

Tooftaalee hiikkaa garaa garaan yoo taa’es hundeen yaada “Theopneustos” garuu

barreeffamootni Macaafa Qulqulluu hundi dhiibbaa Waaqayyoo fi hirmaannaa Waaqayyootiin

kan barreeffaman ta’uu isaanii agarsiisuu dha. Kana irratti dabalataanis, sagaleen “Macaafota

Hunda” jedhu hundi “Graphe” kan jedhu yommuu ta’u kunis Macaafota Macaafa Qulqulluu

keessa jiran qofa kan ibsu malee maxxansaawwan Hafuuraa kanneen biroo (kitaabota, barruulee)

fi kan kana fakkaataniif kan tajaajilu miti. Dhimma kana irratti yaada garaa garaa (theories) tu

jiru. Ilaalchota Waaqayyo Macaafa Qulqulluu barreessisuuf ykn Hafuura isaatti kan fayyadame

hammaa fi sadarkaa garaa garaa dha kan jedhan irratti yaada (theories) hirkatani dha.

2.1. Ilaalchota (Yaadota /Theories/) Hafuura Waaqayyoo

   2.1.1. Ilaalcha Yaada Sagalee /guutuu/ (Full inspiration of words)

Yeroo barreeffamootni kutaa Macaafa Qulqulluu gara jalqabaa barreeffamanitti Waaqayyo

barreessitootaan filannoon jechootaallee otoo hin hafiin isaan filateera jechuu dha. Kunis

gaggeessaa Hafuura Qulqulluu malee kan barreeffame hin jiru jechuu dha. Haa ta’u malee,

yaadni (theory) kun kanneen biroo hundarra fayyaa fi deeggarsa Macaafa Qulqulluu kan qabu

ta’ee in argama. 

2.1.2. Yaada sagalee sagaleetiin (Mechanical and word inspiration)

Waaqayyo barreessitootni sagalee isaa barreessan hirmaannaa tokko illee akka hin goone

taasiseera kanaafuu miirri barreessitootaa tokko illee hin barreeffamne jechuu dha. Kun immoo

yaada gaddi, gammachuun, oriisaan fi kkf barreessitootaa kan hin dhuunfatamne isa taasisa.

2.1.3. Yaad-rimee /ጽንሰ - ሀሳባዊ/ (Idealistic approach)

Waaqayyo barreessitootaaf kan kenne sagalee isaa isa sirrii osoo hin ta’iin yaad-rimee isaa

qofaadhaatii ilaalchichi ‘barreeffama namootaati’ kan jedhu yommuu ta’u abbaan Macaafa

Qulqulluu namoota akka ta’an barsiisa.

2.1.4. Gar-tokkoo Hafuura Waaqayyoo (Partial inspiration)

Yaada kutaawwan muraasa Macaafa Qulqulluu irraa fudhataman qofaadha gaggeessaa

Waaqayyootiin kan barreeffaman jedhu dha.

2.1.5. Ortodooksii isa Haaraa (Neo -orthodoxy): Yaada (Theory) namni Kaarl Bart jedhamu

dhiyeesse yommuu ta’u, yeroo Macaafni Qulqulluu barreffaametti gaheen Hafuura Waaqayyoo

yoo jiraate iyyuu Macaaficha keessatti garuu yaadni dogoggoraa in argama jedhu dha.

2.1.6. Hafuura Uumamaa (Natural inspiration theory): Barsiisa hunda irra hamaa fi Macaafa

Qulqulluu akkuma macaafota halleetti/kamiitti/ kan lakkaa’u dha.

                 Ragaa/Mirkaneessa/ Hafuura Waaqayyoo

A. Dhuga-bahumsa Kiristoos:

Macaafni Qulqulluu macaafa Hafuura Waaqayyoo ta’uu isaa ragaa guddaa nuyi argannu Yesuus

Kiristoos mataadhuma ofii isaa irraa dha. Waan hundumaa caalaa immoo, inni macaafota irraa

caqasuu fi barsiisuun aangoo macaafotni qaban mirkaneesseera. Bu’uura Mat 5:18tiin seera

keessaa qubeen/tuqaan/ tokko akka hin dabarre dubbachuudhaan sagalichi Hafuura Waaqayyoo

ta’uu isaa hubachiiseera. “Tuqaan tokko” ykn sagaleen tokko hin dabartu jechuu isaatiin tokkoo

tokkoon sagalee isaanii Hafuura Waaqayyoo ta’uu isaa guddiseera.

Yoh 10:35 irriatti kitaabni immoo waan hin diigamneef Mat 1:22 – 23 sagaleen Kakuu Moofaa

yommuu raawwatu ilaaluudhaan fi kkf sababii kanaaf barreeffamootni Macaafa Qulqulluu

keessa jiran kan namni uume otoo hin ta’iin Hafuuraan gaggeeffamuudhaan kan

barreessisiifaman ta’uu isaanii beekuun in danda’ama (2Phex 1:21).

B. Dhuga-baatota Barreeffamootaa

2Xim 3:16 irratti kallattiidhaan sagaleen Macaafa Qulqulluu Hafuura Waaqayyoo akka of

keessaa qaban barreeffameera. Kunis sagaleen ykn barreeffamotni Macaafa Qulqulluu hunduu

Hafuura Waaqayyoo akka of keessaa qaban ni mirkaneessa. Akkasumas 2Phex 1:21 irratti

namootni haala kamiyyuu keessatti gonkumaa kaka’umsa ykn beekumsa ofii isaaniitiin akka hin

barreessinee fi barreeffamootni hundinuu kan barreeffaman Hafuura Waaqayyoon

gaggeeffamanii akka ta’e barreeffameera. Kunis jechi“Kaamenedaatikaa” jedhu barreessitootni

kallattiidhaan yaada mataa isaanii dhiibbaa kamiiniyyuu barreessuu akka hin dandeenye

agarsiisa. Kana irraa kan ka’es, barreeffamootni jalqabaa (Original manuscripts) raawwatanii

dogoggora kan hin qabne dha.

    3. 3. Qabiyyee fi Hundeeffama Keessa Macaafa Qulqulluu

Yihudootni barsiisota macaafotaa Macaafota Kakuu Moofaa 39’n iddoo sadiitti isaan qoodu.

Qoqqodamsa kana Gooftaan ofii isaayyuu barumsa isaa keessatti itti fayyadameera. Yihudootni

qoqqoodamsa kana salphaatti “ታናክ” jedhanii waamu. Kana jechuunis:

1. ታ = ተዉራት (Seerota)

2. ና = ነቢም (Raajota)

3. ክ = ኬቱቢም (Macaafota Faarfannaa) jechuu dha (Luq 24:44).

Beektotni sirna Hafuuraa immoo qabiyyee Macaafotichi of keessaa qaban irraa ka’uun, Kakuu

Moofaa iddoo 4tti, Kakuu Haaraa iddoo 4tti hundeessaniiru.

Macaafa Waaqayyoo keessa barbaadaatii dubbisaa!Waaqayyo ofii isaatii kana

dubbateera (Isa 34:16)